Javascript DHTML Drop Down Menu Powered by dhtml-menu-builder.com



من المجتمع: " اشاعة ...

خليل بواب :: 2012-12-16 [03:06]::
" يا نيال لعندو مرقد عنزه بلبنان " ..........

يمنع منعا باتاً على اللبنانيين رمي الهموم في البحر لأن ذلك قد يتسبب بكارثه كبرى (تسونامي) وتمنع أيضا أي شكوى ،لأن (الشكوى لغير الله مذله )، ويمنع أيضا الكلام تماشياً مع المثل القائل (إذا كان الكلام من فضه فالسكوت من ذهب) ... مين قال إنو حياتنا وعيشتنا صعبه( إشاعة) .... وفي غلاء وشحار وتعتير( إشاعة) .... والناس مش قادرين يدفعوا أقساط المدارس والجامعات وثمن الكتب والقرطاسيه وثمن الدواء والمستحقات وايجار البيت والمحل وقال في ناس مش قادرين يعطوا مصروف المدرسة لأولادهم معقول كذبة و(إشاعة) .....
مين قال إنو الشباب ما عم بيلاقوا شغل وعم بيشتغلو بشغلات ما درسوها ولا تخصصوا فيها وقال شو شبابنا عم بيهجوا من البلد( إشاعة) ....
شو كمان قال إنو الشباب مش قادرين يتزوجوا ويفتحوا بيوت شوفوا أما كذبة (إشاعة) ....
اسمعوا أما سمعة قال إنو الناس عندهم ضيقة خلق وتوتر عصبي ومزاجهم معكور وما حدا طايق حدا والناس ماشية بالشوارع عم يحكوا مع أنفسهم بالإشارة وبالومى ( إشاعة ) .....
وقال الشعب لما بيحضر الأخبار على المحطات اللبنانية بينقهر وبيقرف وبينزعج وبينقل على محطة space toon أو عالم الحيوان ( إشاعة )
وقال انو الكبار بيختلفوا بتطلع الفلة براس الصغار ( إشاعة )، واسمعوا أما خبرية قال الشوارع صارت زواريب وعنا الشوارع أصغر من الأرصفة وإنو ما في مواقف للسيارات وما بيقدر الواحد يصف سيارته حد محل أو حد بيتو، والناس ما بتقدر تمشي على الرصيف لأنها أصبحت خاصة للموتوسيكلات، وزكت ووكت قال المشاريع بالشوارع بتبقى سنين لتخلص وفي عجقات سير خانقة والناس عم بيتعطل شغلها (إشاعة) ...... والناس ما عم بتدخل على المدينة بسبب حفر الشوارع والعجقات كلوا كذب ( وإشاعة ) ....
وقال نحنا ما منهتم بنفسية الأطفال والعائلات وقال ما عنا منتزهات وملاعب وملاهي وحدائق مجانيه لكل الناس، معقول شو ما عنا قلب، أكبر( إشاعة) .......
وقال ما في ضمان صحي لكل الشعب وفي أدوية ولحوم ودجاج ومعلبات غذائية فاسدة ، مش معقول( إشاعة) ...............
وكمان عم بيتخنوها قال إذا مريض عم بيموت وكان فقير وما معوا يدفع مصاريف المستشفى بيموت ع بابها وما حدا بيطلع فيه ، شو مفكرينا ما عنا إنسانية ، كمان هيدي ( إشاعة) ...
شوفوا وسمعوا وقشعوا وطسوا والحاضر يبلغ الغايب يا جماعة مش عارف كيف بدي قولها والكلام ما عم يطلع مني حكي غريب قال نحنا عنا نصب وإحتيال وفساد وسرقة ورشاوي وغش وظلم ومحسوبيات وواسطات… أستغفرالله هيدا إفتراء و(إشاعة) ....
وعم يقولوا انو قال في ضيقة إقتصادية والمراكز السياحية والمؤسسات والمصانع والمحلات التجارية عم بتفلس وتنكسر والمستثمرين عم بيهجوا والموظفين عم بيتسرحوا من عملهم وما في مصاري مع الناس والطلاق عم يزيد وعم تخرب البيوت وتنهان النفوس والسرقة عل الماشي والنشل على الدراجات النارية ( إشاعة)، والكبير بياكل الصغير والغني بيمزمز على الفقير وكلها ( إشاعات ) وقال انو نوابنا بس منشوفهم بالجنازة وبالتعازي وبموسم الإنتخابات أو بشي مصيبة.... هيدا كذب و ( إشاعة ) ...
أكبر كذبة بالتاريخ: قال نحنا ما عنا كهرباء وقال في مواتير للتجار وبيبيعوا الناس كهرباء وقال بيسموه إشتراك، كيف بتبين الكذبة؟ من كبرها ، دعايه مغرضه( إشاعة) ..... قال نحنا ما عنا مي ومنشتري ميّ ومنقول خيّ ( إشاعة) ..... وحسب ما عم بيقولوا صار عنا مصيف إسوا جبل الزبالة ( إشاعة )، وقال المغتربين عم يعوفوا حالهم ويضيق خلقهم لما يجوا ع بلدهم ما عم بينبسطوا ولا عم بيفرحوا وقال انو كل شي عنا أغلى والأسعار كتير مرتفعة وقال نحنا منغليّ الاسعار عليهم (شطارة ) وقال كل شي حويلهم بيمقت وبيسم البدن عم بيشوفوا أحبابهم وبيطمئنوا على أهلهم وبيهربوا ، مش معقول ( إشاعة).
صايرين عم نسمع قصص بهالأيام شي مثل الكذب معقول في عاقل بيصدق هيك كلام، كلها أفكار هدامة، وما تردوا إعملوا حالكم مش سامعين …… بيقول المثل " يللي بيعرف بيعرف ويللي ما بيعرف بيقول كف عدس"…… وقال انو في مثل غيروه وصار " يا نيال لي عايش بمرقد عنزة خارج لبنان" ……((( من أكبر الإشاعات)))


  1. eban alblad
    (من: men elkora el2rdya)

  2. sma3at sam3a eno badon ya3to 50.000$ la kel wahd belabnan wla 2sh3a

  3. ali
    (من: london)

  4. Kalam zay el3asal thnx mr 5alyl kol 7akyak mazbot. Wmahdomen.

  5. علي مهنا
    (من: ابدجان)

  6. يا ريت اشاعه

  7. أم هادي
    (من: Kuwait )

  8. يعطيك الف عافية على الوصف الوافي لحال بلدنا وفاتك وصف المتأسلمين الذين كل ما عم بيزيدوا والله صدق زياد الرحباني من ثلاثين سنة عندما قال هيدي بلد هيدي مش بلد هيدي قرط ناس مجمعين . هلق لازم نقول يا نيال لي راح يندفن بلبنان ! ! !

  9. هادي حمود
    (من: الجنوب)

  10. وقت الانتخابات بريجعوا بينتخبوهم

  11. زينب شور
    (من: صور)

  12. والله معك حقك بي كلامك يسلم تمك

  13. taysir
    (من: sour)

  14. wayn awiad sour leh ma 2ilon dor

  15. hassan
    (من: sour)

  16. yareet law 3endi mar2ad 3anzi bareet lebanon kil ha li 2elto mne3rfo bas 7asayna bas katabto balad ma byenfa3 la shi

  17. جنوبية
    (من: جنوب لبنان)

  18. للاسف هيدا الواقع اللي عايشينه تسلم ايدك استاذنا الكبير

  19. وفاء الحره
    (من: الحاره)

  20. أين دور أبناء مدينه صور لماذا هذا التهميش لنا لا أحد يحاسبنا لا نتحمل أخطاء الاخرين وشكراً لهذا الموقع العظيم يا صور المتنفس الوحيد لنا

  21. Abbas
    (من: يا صور على بالي ترجع الايام. )

  22. عم يقولوا انو الناس بكرة نازلي تسكر طرقات صور على كل المسؤولين بالمدينة وتحتجزن ببيوتن.... يا رب ما تكون اشاعة

  23. زهرة خالد
    (من: صور)

  24. وقال نحنا ما منحاسب نوابنا والمسؤولين ومنرجع مننتخبن الف مرة وما عنا ديمقراطية وحرية تعبير والولد بينزل من بطن إمو عم يهتف لشي زعيم ولازم يجامل ويمسح جوخ او ما بيوصل للي بدو يا (كمان اشاعة)

  25. najat siklawi
    (من: tyr)

  26. كلامك عين الواقع، ولكن هل من معالج؟! وأعجبتني كثيرا لفظة الإشاعة خصوصا أنها أسبق من الحقيقة في بعض الأوقات، وبشكل عام هي حجة الضعيف الذي يريد أن يهرب من واقعه ويثير ضجيجا عبر الإشاعات، وكم من الناس تثرثر فيصبح صوتها كالذباب مقرفا ومملا، أما كلماتك هنا يا أستاذ "خليل" فهي الواقع و شكرا.

  27. علي
    (من: صور )

  28. أول مره حدا بيتجرئ ويحكي شكراً لموقعنا الأول يا صور وللاستاذ البواب

  29. زهراء خشن
    (من: الجنوب)

  30. كل هل الحكي صحيح 100% بس مين بيشعر ويحس الكل مش فارقه معو

  31. Joujou
    (من: Tyre)

  32. Kila masamir waki3 ya 7aram 3ala 3ishitna

  33. سكينه
    (من: صور)

  34. هي كل حياتنا بالبلد إشاعه وعايشين على الاشاعه وكل عمرنا صار كذبه واشاعه ارحمونا خافوا الله

  35. أحمد بواب
    (من: صور )

  36. بعد ما شفنا شي يا ابن العم بدنا نترحم على هل الايام الله يحميك

  37. غاده
    (من: Abidjan)

  38. شو هالابو حسن عن جدكبير كلامك درر هالدنيا صارت كلها اشاعات بس للاسف كلامك حقيقه وحقيقه مره مش اشاعه للاسف كنا نتمنا يكون اشاعه الله يديمك يا حبيب الشعب

  39. عبد الرحمن ابو عياش ابو حمزة
    (من: صور البص)

  40. والله الحق معك كله اشاعات وحتى ويمكن الموت بالبلد اشعاعة تسلم ايدك استاذ ابو حسن

  41. غاده
    (من: Abidjan)

  42. شو هالابو حسن عن جدكبير كلامك درر هالدنيا صارت كلها اشاعات بس للاسف كلامك حقيقه وحقيقه مره مش اشاعه للاسف كنا نتمنا يكون اشاعه الله يديمك يا حبيب الشعب

  43. salam
    (من: sour)

  44. شكرا لهذا الكلام الواقعي وهذا حال البلد ولكن لا حياة لمن تنادي

  45. عباس
    (من: على طول الحق عالمسؤولين!!)

  46. انا ما بحط الحق على المسؤولين بالاخص نواب ومسؤولين كتلة التحرير والتنمية لانن ما مقصرين ابدا تجاه صور ولا تجاه الجنوب في دور كبير للعدو الاسرائيلي لشل البلد اقتصاديا كل اللي عم يحكوا ما عم قدروا حجم المخطط ايه انا حا ارجع انتخبن من البلدية للنيابة ومش بس انا كل الناس فيا يا ريت ما كيف مكان نرمي اللوم وننتقد والبلد وضعو ما منيح بس مش لدرجة اللى عم يوصفوها الشباب والحمدلله على كل شي .

  47. د حسن سلمان فاخورى
    (من: صور )

  48. جيده جدا -لكن طالما تملك الانتقاد باسلوب ساخر محبب -وطالما عندك فكر واسع -نصيحتى وكرمالى جرب اللغة العربيه الصحيحة -لعلك طبعت كتابا فتكون النتيجه افضل --جرب

  49. طلعت الشمس
    (من: رهيب وحلو استاذ خليل)

  50. انك هنا تبيّن عين الحق والحقيقة بانت مع ذوبان الذباب عفوا" الثلج

  51. يا مرايتي مين احلى
    (من: انا وبس)

  52. اطلّعت على لمراي وانا لابسي لعوينات ظنّيت انّي ذبابة بس كلامك يا كبير انجاني من جديد الى نفسي

  53. ابن البلد
    (من: صــــــــور)

  54. كمان في اشاعة كبيرة نسيتها يا استاذ خليل عن حديقة صور الواسعة عند مدخل صور الجنوبي اوجدها المؤتمر الشعبي لدعم صور ومساحتها اكثر من 100 دنـــــــم عملـــــوها مكب للنفـــــــــــــــايات......

  55. نسرين سعد
    (من: الجنوب)

  56. وقال الأطباء تجار وبياخدو سمسره من شركات الأدويه وبيطلعلن سفرات ورحلات على الوصفات الطبيه لازم الدوا أو مش لازم بيكتبوا للمريض وعلى اي اساس حلفوا اليمين إشاعه

  57. ابرهيم
    (من: Bob-19&2@hotmail.fr)

  58. السلام عليكم لك يا أخي والله لبدو يشتغل وينستر شو ماكان بيشتغل بس ناس بي هل أيام صار كلون بدون يعيشو نفس شئ كلن بدون يكون عندون تليفونات وسيارات وبدون يقعدو كل نهار عل قهوه ولااركيل وبعدين بقولو لك ما في شغل خلصون بلا كاذب شعب لبنانيه بدو يعيش بلمظاهر وباليش وكل هل مصرين وسوريان لي عم يشتغلوا بلبنان وآخر شئ والله مافي شغل لك هيدي حجي خلصونا بقا

  59. فاطمه
    (من: الحاره)

  60. يللي إيدو بالمي مي مش زي يللي إيدو بالنار ويللي بياكل العصي مش زي يللي بيعدا. إذا كان في شويت ناس مرتاحين الأكثريه تعبانين المرتاح يجرب يعيش عيشة التعبان وبعد منها يحكي

  61. Hussein Bawab
    (من: Sour)

  62. 2al fee balad ismo Lebanon (esha3a) :D

  63. A.S
    (من: RDC)

  64. مقال أكثر من رائع

  65. elias
    (من: sour)

  66. Yeslam hal tem (mish esha3a)

  67. شاهيناز قهوجي
    (من: sour)

  68. لقد جمعت أوجاع المواطن في هذا النقد الرائع بأسلوب جديد علينا و هذه (الإشاعة) هي واقع نعيش هي الم نعاني ، و هي صورة ملونة توضح ما يجري كل يوم .مشكور أبو حسن .

  69. محمد جرجوعي
    (من: مدينه الحرف)

  70. من الجميل ان ننتقد الواقع الذي نعيشه وان كان باسلوب ساخر لان كله يهدف في خانه النقد البناء, لذا يجب ان نعي ان كل هذا وما يجري ما جنته يدانا وكما تكونوا يولى عليكم! لذلك يجب ان نعزز مبدى المحاسبه والذي يبدى ولا ينتهي من بدايه الاستحقاق النيابي وصولا لالغاء الفساد السياسي!

  71. رولا عيسى
    (من: الجنوب)

  72. قال طلع عنا غاز والدوله رح بتقدم لكل مواطن شقه سكنيه إشاعه وقال ما رح يبقى اي مواطن عاطل عن العمل إشاعه وقال بلدنا رح بتصير الأولى بالسياحه إشاعه وقال لكل مواطن سفره للإستجمام مجانيه إشاعه . حلوي ورائعه يا صور وخليل بواب

  73. ابو محمد
    (من: صور )

  74. الأخ ابراهيم 29 كلامك صحيح ولكن الموضوع المطروح ( إشاعه) شامل كل جوانب حياتنا وألامنا وشكراً

  75. علي أحمد بزي
    (من: الجنوب )

  76. لم أقراء بحياتي نقد بهذا الاسلوب المميز الساخر والمهضوم الغير ممل والشلمل الف شكر لموقع يا صور وللكاتب

  77. ندى عسيران
    (من: صيدا)

  78. بدفع عمري ويكون هيدا الكلام اشاعه

  79. سهاد برجي
    (من: ابدجان)

  80. إذا إشاعه راجعين على لبنان هاهاها

New Page 1