بالكلمات المؤثرة: آية تحكي كيف تصر على مقاومة السرطان والانتصار عليه بمساعدة زوجها جابر .... 'ما رح اتركك ، ورح اعطيكي دوا بأيدي كل يوم'
صار معي سرطان بعد زواجي بي ٣ سنين كنت احكي لأمي انه موجوعة ودايخة و قلة حيلة و قلة شهية عالاكل…
صارت ماما تقلي بلكي حامل كوني حملت اكتر من مرة و روحت ، بس اخر مرة بعد رمضان ٢٠١٨ صار عندي تشنجات نصفية على جنب اليمين و ما كنت مفكرة في شي يوصل للسرطان مهم عملي فحوصات زوجي اول يوم كان نهار جمعة كنت نايمة عند اهلي نهار سبت صبح بتفاجئ بزوجي عم يفيقني و هو مرعوب و مضايق بقلو شوفي بقلي قومي بدي اخدك عالمشفى مشان تشنجات ما اخدت و عطيت رحت بالمستشفى و فجأة بلاقيهن علقولي أدوية و مصولي و حجزولي غرفة و دخول ..
انا تفاجأت خبروني عندك التهاب بالدم شوي عالي بدو كم يوم و بتطلعي و بتصحي قلتلو ماشي
مرقو اول ٣ ايام تاني ٣ ايام بيعملولي خزعة من لب العضم جنب القلب بحس بشي غريب و بصير عندي شك عدا تالت ٣ ايام نهار جسمي تعبت عالاخير جسمي ضعف ٧ كيلو بي ٩ ايام وجي تعب صار لوني اصفر و صرت شاحبة و عدا عن أبر المسيل لي يحرق جسمي و كل يوم صبح فحص دم و أدوية طالعة و أدوية نازلة و قلق بليل ما اقدر نام
و زوجي كل يوم الهم ما ينشال عن وجو
وزوجي واقف عجنب ومو عارف شو يحكي ….
قلتلو شو في ؟
قلي هلئ ارتاحي ما فيكي الا كل خير…
ما بعرف كنت تعبانة كثير ومش مركزة بس ما صدقتو …..
بعد يومين ضاق خلقي بدي أشهر من المستشفى دقيت لزوجي ، اجا زوجي ومسك ايدي، قلي حبيبتي استفقاد ربنا رحمة !
وانا عارف انك قوية ورح تتحملي،رح تتعالجي و ترجعي مثل اول وأحسن … كلن كم يوم و بتضهري
لمهم ضهرت بعد ١٢ يوم معاناة حسيت حالي تحررت بس للاسف بعت معي دكتور علاج على البيت ما قلت لاء
فليت علبيت اول يوم كان سبت تاني يوم الاحد كان عندي عزا مع اهلي رحت سمعت المجلس و تضايقت صار جسمي متل لي اكل قتلة بعصاية حديد يوجعني كل مفصل بجسمي ضهرت لبرا حتى ما حدا يحس علي نزلت علبيت عم اخد الدوا بتفاجئ بلا روشتة بيحكمني الفضول
بفوت على غوغل بحط اسم الدوا بيطلعلي سرطان الدم
بقول انا اكيد في شي غلط لإن لو في من هالحكي كان قلي زوجي هو ما بخبي علي رجعت انت على موقع تاني كمان نفس النتيجة
هون نصدمت شو بدي قول لأهلي كيف بدي خبرن و خصوصي اني الكبيرة عند اهلي و مدللة عند بابا و كلون معلقين فيّ ما كان همي انو انا حاملي هالمرض بالعكس قلت الحمد الله يا رب بلاء الدني ولا بلاء الآخرة
بعتت ورا زوجي قلتلو انا معي السرطان قلي كذب هالحكي انت ما اشبك شي مين قلك هيك قلتلو شوف شو كاتبين هون على اسم الدوا عتلفون و صار يبكي و يقلي ليه. لتفوتي و تستكشفي ليه فضولية هالقد انا كنت ناطر الحكيم يحكيكي و يفهمك شو القصة صرت ابكي و اضحك بنفس الوقت و قلو يعني رح موت قبلكن
صار يقلي ولك بلا حكي المسلسلات ما رح تموتي ، بس لازم تبلشي علاج منتظم حتى تصحي بس قلتلو عندي شرط ما تخبر اهلي هلق
بوقتها امي كانت حامل بشهر ٨ و اختي حامل بشهر ٣ و بابا عامل عملية جراحية لا ضهرو ما كان بدي ينقلب البيت من هالموضوع
هالكلمة وقعت على راسي مثل الصاروخ! و خطر ببالي كيف بدي خبر اهلي و يشوفو وجع العلاج، وأكيد زوجي ما بيتركني لإن اخدني عن حب
قلتلو رح تتركني صح !
ضحك وقلي شوجنيتي ما رح اتركك ، ورح اعطيكي دوا بأيدي كل يوم
قلي انا بنسى لمساتك على راسي كل ما امرض و سهرك علي لما غرب و اسخن و تسهري علي كل الليل متل امي
لمهم مرق شهر العلاج و انا رافضة خبر اهلي بس هو كان ذكي خبر عمي الكبير احتياط حتى يخبر اهلي بالوقت المناسب
ليوم كنت عند بيت عمي و فقت عم صرخ من وجع ايدي اليمين كأنها عم تنشل قلتلو وديني عند اهلي خلص خبرون قلي نطري لصبح نزلت انا و حكيت مع عمي الكبير بالموضوع بحضور ولاد عمي لي ربينا سوا و صارو يبكو و تفاجأوا بالخبر لي ما كان متوقع
بهاي الليلة ما رحت عند اهلي طلعت عند بيت عمي رجعت حتى ما كون موجودة و شوف تعابيرن و دموعن لإن اكيد رح يصير معي انهيار لي هو مش بمصلحتي
خبرن و كانت الليلة من اقسى الليالي لي مرقت على اهلي
امي كانت ماشي من الاول معي هالمرض
بي نهار اخواتي الصغار يقولو يعني اية رح تموت متل جدو كونون أجدادي ماتو بالسرطان انهار البيت نهارو اهلي و بكا و دموع و ما ستوعبو الخبر
تاني يوم بنزل الكل مصدوم و عم يحاولو يخبو دموعن عني
بس انا كنت قوية و فرجيتن انو لموضوع عادي عندي
الكل صار بوقتها بيسالني زوجك بعدو معك ؟كيفو معك؟ بحبك؟ متحملك؟
قلتلن. ايه بعدو معي حمدالله هاي نعمة بس مع الوقت قدرت كل لحظة مرقت بحياتي صارت كل لحظة مع اهلي و زوجي قلا قيمتا
من وقتا بحاولو جميع الطرق يسعدوني
و يقولولي نحنا حدك بس فعليا كنت انا عم قويهن مش العكس
صرت روح اعمل الفحوصات بس ما توقعت بنت عمرا ٢٤ سنة توصل لمرحلة تخاف من الإبرة صرت ابكي مع كل شكة إبرة بس كنت روح لحالي عشان ما حدا يضايق علي بيوم راح معي زوجي و فتت اخدو دم و طلعت لقيني عم ابكي قلي موجودة يقلبي
بكيت وقلتلو متوجعة كتير هون عبطني و صار يبكي و يقلي بتهون
قلي رح تمشي ….
وصارت حالتي بعد كل يوم و كل شهر اني صرت اخسر شعري؛ والشغلات الحلوة الي فيي….
بشرتي كانت باهتة كتير وعيوني ذبلانين، كنت اطلع عزوجي بحسرة واحكي شو ذنبه يعيش هالحياة معي ….
بعد فترة من العلاج قللتله بعدك بتحبني،،،، حسيت اني ظالمته معي ، بتذكر وقتها عصب علي وصار يحكيلي انا مقصر معك بشي قلي انا بعشقك ما صدقت عا الله كيف حصلت عليكي !
قلتله لا والله بس انا ظالمتك !
قلي … ولو انا صار معي هالشي متأكد ما تخليتي عني ضلك قوية !
مرة من المرات بتعرف على زميل قلي بالشغل عرف اني مريضة و سألني زوجك بعدو معك قلتلو انا و عم اضحك انو ليه بدو يتركني لما هيدا قضاء الله و قدرو قلي الحمد الله و دمعت عينو قلتلو شوبيك قلي بي تركنا بعد ما عرف انو امي معا السرطان قلتلو ليه قلي لإن صارت ضعيفة و هرّ شعرا و بطلت حلوة قلتلو بحبا كان قلي ايه بس ظاهر بحب شكلا كان بس
وقتها شفقت عليه عنجد، تذكرت كيف زوجي تقدملي بطريقة تقليدية؛ ورفضته، وبعدها رجع تقدملي ورجعت رفضته ، ولحد ما تعرفت علي وارتحتله وافقت عليه.
و رغم انو عم يتحمل وجعي و صراخي من النوبات و الوجع و التذمر طول الوقت من ورا ادويتي المهدئة و نومي الطويل و قلة حيلتي بلبيت و انطفاء وجهي عن الأول
وقتا جيت علبيت سالتو لزوجي بتحبني قلي ليه بضلك تساليني هالسؤال حكيتلو القصة زعل كثير وحضني، قلي والله و لي اسمو الله ما بفرقني عنك الا الموت وقلي كنت عند الدكتور وقلي انك متحسنة كثير !
بعد فترة من العلاج صرت فوت بحالات اكتئاب وضليت فترة مكتئبة كثير، بس زوجي ما قصر ليغيرلي جو، يحسن نفسيتي، يساعدني بكل شي ينضف البيت و يهتم فيني و يعملي اكل و يجبلي عصاير كونو ممنوعة عن الحلو و بس يجي عبالي الحلو ياخدني مشوار ينسيني
كنت حابة كل ذرة بحياتي مشانه بس! لانو كان قوتي وقت ضعفي …
فعليا انا عم اتعافى من هالمرض، بسببو من بعد اهلي لإن دائما كان سندي و فرحي و دوائر بالرغم من انو قلنا ٤ سنين متزوجين ما طعمها الله أولاد لإن كنت حاملي هالمرض و بس بلشت علاج خلينا الحكيم ممنوع الأولاد بسبب العلاج ممنوع وقفو لانو عندي ياه مزمن بس دائما بقول بي بالي بس يجيني بنت رح بقلا اوعك يا ماما تتزوجي واحد يحب شكلك وبس، تزوجي واحد يحب روحك الحلوة، عقلك الكبير، تفكيرك !
تزوجي عشان لو وقعتي يوقفك وما يتركك !
نصيحة لكل بنت تزوجي واحد يحب قلبك و روحك لانو الزواج استقرار ، تزوجي الشخص الي بدك تقضي كل عمرك معه لو شو ما صار لاي حدا فيكم!
تزوجي الي حب قلبك وروحك مش الي حب شكلك ، واعرفي انه الزواج في ايام حلوة كثير وفي ايام مرة ! بس مع لي بحب روحك كل الزعل رح تنسي …..
لانو اللي بيحبك رح يفرجيكي الحياة الحلوة من خلالو هوي وبس.
