أبشر بقرب الفرج ... بقلم الأستاذ عدنان ح. أبو خليل
أبشر بقرب الفرج وحدك عالمصير بتمون
بتهون يا إبن البلد ، يا إبن البلد بتهون
ثلج الجبل بيدوب
وبيبقى الأمل موجود
مهما الليالي تطول
عين الشمس بتعود
دولاب الزمن من الشوك
ودرب السما من الورود
مهما العذاب يدوم
تبقى بالرجا موعود
لا تندب الماضي
عمر البشر محدود
لا تنسى الحاضر
الظلم لأقصى حدود
بتهون يا إبن البلد ، يا إبن البلد بتهون !
أبشر بقرب الفرج وحدك عالمصير بتمون
الناس لتسمع خبر جديد خيفانه
تتلمس طريقها بين خيبة أمل وامل تاني
بالجبل غابة شجر بالنار ولعانه
تستجدي نقطة مطر وتسأل عن الباري
بتهون بتهون ، يا إبن البلد بتهون
أبشر بقرب الفرج وحدك عالزمن بتمون
كل البشر بتنام وبيبقى الضمير صاحي
لا تفقد الإيمان ما عدل السما جايي
أرسم على الحيطان حلم شعب واعي
واكتب على الكوراس تاريخ شعب باقي
لا ترمي بالنهر حجر، نبع النهر صافي بيكفي القلوب صارت حجر صلب قاسي
وأقسم باللي خلق الوطن وشعب الوطن
وأرفع ارز العلم وابشر بقرب الفرج
بتهون بتهون ، يا إبن البلد بتهون
أبشر بقرب الفرج وحدك عالمصير بتمون !
