كتبت السيدة بتول ملحم عن ابنتها ماريا وليد نزال ما يلي:

من لما عرفت انو ماريا رح تخلق مع كروموزوم زايد .. صرت فتش على امهات عندهم اولاد #متلازمة الحب .. بس ما كنت لاقي كتير .. صرت شوف كيف فيي ساعد بنتي لما تخلق .. شو فيي قدملها لتكون متل غيرها .. خلقت ماريا .. وجابت معها الفرح والبسمة .. الحب والتعلق .. بكينا كتير قبل .. بس من لما طلّت علينا .. قررت ما عاد ابكي .. قررت اوقف على اجريي وكون الام اللي شايفينها هلأ .. كنت بركض فيها اول شهر من حكيم لحكيم .. من مستشفى لمستشفى .. لأتطمن انو كل شي منيح.. كنت اتعب وقول المهم ماريا .. اليوم بعدني عم بركض فيها من جلسة لجلسة .. من موعد لموعد .. والحمدلله عم تطور بطريقة كتير منيحة .. ومن وقت ما خلقت انا صرت احكي اكتر عن ماريا .. وصار الفيسبوك عندي وسيلة توعية عن #متلازمةالحب .. انا مستعدة ساعد اي ام هي بحاجة ..
كنت خايفة من المجتمع بس الحمدلله لقيت دعم كتير قوي ..
لكل ام .. لكل بي .. لكل خي او اخت .. للمجتمع .. حبوا هيدي الفئة من الاطفال .. هني سبب الحب والفرح ببيوتنا .. هني الرزقة والهدية اللي ربنا بعتها لنحميها ..
بتمنى انكن تنشروا يللي كتبتوا لأن يمكن يكون في ام بحاجة انها تفضفض وما ملاقية حدا ..

•