Javascript DHTML Drop Down Menu Powered by dhtml-menu-builder.com



من المجتمع في العيد : "موجعني الحنين"


خليل بواب :: 2014-07-29 [01:00]::
قلبي من الشوق عصر معصور، بحبك يا أجمل المدن يا صور … حبيبتي مشتاق لوجهك، نور البنور …يا ناس ارفعوا عن صور الستار وخلونا من جديد نشوف الإبتسامة على وجوه الناس المخلصين. يا صور إرجعي للزمن الأصيل، بالعيد موجعني الحنين… مشتاق ل اهلك الطيبين … لما كانوا ناسك مع بعض متماسكين… والقلوب البيضا على بعض، ملهوفين … كانوا الكل بعضون عارفين ، بدون سؤال الكبير ع الشبه يعرف الصغير ابن مين… وبدون كلام عيونو تقول يا ابني نحنا لبعضنا محبين… كانوا أهل وجيران واصحاب بالمحبة متنافسين، وعلى المعروف متسابقين … مشتاق لصبحك ومساكي ، بصباحووو الكل مصبحين، ومن الشبابيك والبواب على بعض طالين … وعلى ركوة القهوة الصباحية الكل مضيفين، وبالمحبة والإلفة مشاركين… الفناجين طابين، وحكايات البصارة سامعين… الصبية بالتبصير بتحلم بالعريس، والشاب بيحلم يكون هويي وحبيبتو تحت سقف واحد عايشين …مشتاق روح عالفرن حامل كاسة الزعتر البلدي بالسمسم وبزيت الزيتون، مخلوطين … واعمل الزعتر مناقيش بأصابعي منقشين … وإعزم كل الحي عالمناقيش السخنين… والجارة تعمل الشاي على بريقين ، والكل يكونوا باللمة مبسوطين … مشتاق ل كزدورة المسا بنفس الشارع رايحين جايين، ونكون كلنا مستمتعين… يا ريت برجع بتفرجى عالجاروفة وراقب بمتعة شغل الصيادين.
مشتاق روح عالمراجيح بيوم العيد، ونطلع بالدوّيخة وننزل منها مسطلين … ونتزلحط بالزحليطة ونصير فوق بعض مدربكين … وبالزيز أنا طالعين ونازلين، وبالهزيزة نهز ونمشي منها مهزوزين …وبالبريمة نبرم ونصير مدروخين … ونجرب حظنا مع لعيبة المزوج والمفرد بالفنجان والزهر "الخضيضة" ويضحكوا علينا وعيديتنا مشلحين… يا ريت منرجع نفتل فتلة بالحنطور، وبالسيارة ياخدونا بالكذب ع قبر بنت الملك وعالخرخارة … ونشتري الذرة والتمرس والفول لحد ما نصير عالاخر مفولين … ونحضر أفلام العيد يللي منها نكون زهقانين، ونشوف افلام صامته وحكياتها مش فهمانين … ونرجع عالبيت وتكون تياب العيد من اللعب بالرمل ملتلتين… وتكون كل العيلة على غدا العيد مجمعين … وبعد الغدا اللعب مجددين … ونرجع مرة تانية ناخد العيدية، وبآخر النهار نعود طفرانين… العيديات مطيرين والجياب مفلسين . صور يا حبيبتي إشتقتلك، صرت وأنا فيكي غريب، كل شي تبدل تبديل… يللي كان مني قريب، صار عني بعيد … كلنا صرنا بحالنا مشغولين … شغلتنا الدنيا والكل وراها راكضين … وعالبعد ما عاد حدا يعرف لوين رايحين … يا ناس القلب مشتاق … موجعني الحنين. إرجع يا زمن ونور بقمرالعيد ليالي بلادنا وبالمحبة نكمل العمر… ونكون كل يوم معيدين
فطر سعيد وكل عام وانتم بخير.


New Page 1