المهندس علي وسام قانصو يرثي والدته المربية الاستاذة اسبيرنزا غندور

كتب المهندس علي وسام قانصو ، نجل المُربية الشhيدة اسبيرنزا غندور :
بيسألوني كتير: من وين أخدت هيدي الضحكة؟وبكل عفوية ببتسم وبقول: من أمي... من أغلى إنسانة كانت بحياتي.
هيدي البسمة اللي ما كانت تفارقك، وعيونِك اللي كان دايمًا يلمع فيهن الأمل، بعدن محفورين بقلبي، بعقلي، وبكل وجداني.
ماما... يا قلبي، يا سندي، يا عمري كلّو.منّك تعلّمت حبّ الناس، ومن حنانِك تعلّمت شو يعني العطا بلا مقابل، ومن قوّتك تعلّمت واجه الحياة مهما كانت قاسية.
إنتِ كنتِ أول وأكبر داعم لإلي، وكل خطوة بخطيا اليوم فيها شي من تربايتِك ودعواتِك. وبوعدِك، يا أمي، إنّي كمّل الطريق اللي رسمتِيه إلي، وضلّ رافع راسِك، وعامل بكل كلمة ونصيحة زرعتِها بقلبي.
يمكن غبتي عن عيوني، بس ما غبتي يوم عن قلبي. بعدِك بكل زاوية، بكل ذكرى، بكل ضحكة، وبكل دعوة بطلعها من قلبي لإلك.
الله يرحمِك يا أمي، ويجعل قبرِك روضة من رياض الجنة، ويجمعني فيكِ على خير. اشتقتلِك قدّ الدني وما فيها، ورح يبقى اسمِك أغلى اسم على شفافي، وحبِك أكبر نعمة حملها قلبي❤️